Turtips i Etnedal

Hausten 2006 starta Etnedal kommune eit nytt turmålsprosjekt. ”På tur i Etnedal” heiter prosjektet og tek deg med til nedlagde sylvgruver, gamle festningsmurar, krøterstigar og fjelltoppar.

Har du nokon gong høyrt om dei gamle festningsmurane på Tonsåsen? På 1970-talet vart det oppdaga nokre merkelege murar på ein knaus sørvest for Os seter. Dette var ikkje ein tilfeldig samling stein, men murar bygde av menneske. Lenge trudde ein at dette var reistane etter ein bygdeborg frå folkevandringstida (500 e.kr). Det viste seg derimot at murane var av yngre dato. Nokon sikker stadfesting kunne Riksantikvaren derimot ikkje koma med. Mest truleg var murane bygde under Sjuårskrigen (1563—1570), men dei kunne også vera forskansingar frå Den store nordiske krig (byrjinga av 1700-talet), meinte dei. Murane strekkjer seg i ein halvsirkel omkring ein liten knaus. Frå toppen av knausen er det fint utsyn mot Etnedal i aust og mot dalføret i vest.

Fjelltoppen Himalaya er også blant dei ti turmåla som ein no ynskjer større merksemd omkring. Og trudde du Himalaya berre var for tøffingar med hjelm og klatreutstyr? Tru om att. Himalaya ligg i fin avstand frå Tonsåsen stasjon. Turen opp tek om lag 30 minutt og frå toppen har du eit fantastisk utsyn over Etnedal.

Dei ti turmåla er ikkje av det ekstreme slaget. ”På tur i Etnedal” er eit tilbod for dei fleste og ein kjem langt med godt humør, niste og gode sko. Og så må du ikkje gløyme stemplingskortet. På kvar av dei ti turmåla er det lagt ut stemplingsklemmer og dei med ti stempel på kortet er med i trekninga om ein fin premie. Stemplingskorta er lagt ut på ti ulike bedrifter i Etnedal.

På denne sida finn du kun vegbeskrivingar, vil du lesa meir om dei ulike turmål ligg det mykje god informasjon på heimesidene til Etnedal kommune!