Valdreskulturen

Rakfisken - matspesialitet som har utvikla seg til å bli temaet for ein årleg gigantfestival. Foto: H2W.

Kulturlivet i Valdres prega av mangfald. Vi har eit breitt engasjement i lag, foreiningar og kulturskular som formidlar eit mangfald av kulturuttrykk til barn og vaksne, og vi har profesjonelle utøvarar på høgt nivå som har gjort kulturuttrykket sitt til leveveg. Båe deler er viktige for framtida, og dei er avhengige av kvarandre.

Folkekulturen er sentral i Valdres, og kanskje det mange fyrst og fremst forbind med Valdreskulturen. Tradisjonell folkemusikk og -dans har i lange tider vore viktige element i folks liv, og tradisjonen er høgste grad levande også i dag. 
 
Gjennom alle tider har Valdresnaturen vore ei viktig inspirasjonskjelde for kulturutøvarar på ulike nivå. Vi har i tillegg til dei fastbuande kunstnarane også besøk av kulturutøvarar som er innom i Valdres og hentar inspirasjon til sine uttrykk.

I Valdres har vi gjennom året eit mangfald av kulturarrangement og festivalar. Desse gjer deg sjanse til å oppleva dei dyktige kulturutøvarane våre. Det er stor spennvidde i arrangementa, men alle er prega av profesjonalitet, engasjement og formidlingsglede. Om du er glad i folkemusikk, klassisk musikk eller rock, eller mat og mattradisjonar, så finn du eit arrangement her. Kanskje set du meir pris på fysisk aktivitet, som deltakar eller frå sidelinja?

Uansett – Du er hjarteleg velkomen til å vera med!