Valdres natur- og kulturpark - skjerper sansane

Valdres natur- og kulturpark er ein bygdeutviklingsregion som gjennom langsiktig merkevarebygging knytt til natur- og kulturverdiar – og lokal styring – skal gje auka verdiskaping og livskraft i lokalsamfunna. Gjennom dette vil Valdres ta vare på og utvikle viktige verdiar av lokal, nasjonal og internasjonal karakter, for framtidige generasjonar.

Fjellvandring framfor Uranostind (2157 m.o.h.). Foto: Naturfokus.

Valdres natur- og kulturpark er bygda der eg kjem frå, der eg kan vera, der eg kan vera til.  Dette er bygda der du er velkomen, der du kan vera, og vera til. Dette er bygda der vi i fellesskap skal bygge framtidsnæringar tufta på den unike kombinasjonen av natur, kultur og næring i eit fellesskap.

Samhandling i trivselsbygda

Valdres natur- og kulturpark har definert som sin viktigaste reiskap, ein arena for samhandling mellom reiseliv, kultur og friluftsorganisasjonar, bønder og andre næringsdrivande.
Vi skal samhandle om å lage produkt og opplevingar som er unike etter sin eigenart og som vi kan bygge ein sterk merkevare på Merkevara Valdres.

Merkevara og verdigrunnlaget

I merkevarebygginga skal Valdres ha eit særleg fokus på:

Miljø
Merkevara Valdres skal byggast på ein høg miljøstandard i vid forstand. Miljøspørsmål skal også fokuserast i kvalitetsstandardar som blir utarbeida for den enkelte næring.

Kultur
Merkevara Valdres skal byggast på ein identitet knytt til vår sterke lokale kultur. Her skal vi legge vekt på det vide kulturomgrepet som omfattar alt frå tradisjonskultur og kulturminne, til eit ope møte med det moderne kulturuttrykket i Valdres. Våre kvalitetsstandardar skal til saman synleggjera vår rike matkultur, handverkskultur, byggetradisjonar, kulturlandskap, stølskultur, biletkunst, musikk, dans, lyrikk og forteljartradisjonar.

Det gode og moderne liv i Valdres
Merkevara Valdres skal ha sitt utspring i vårt lokalmiljø, eit lokalmiljø som det vil væra positivt å identifisere seg med. Dei gode opplevingar skal væra i fremste rekkje, og Valdres skal med bakgrunn i tradisjonelle verdiar også utvikle urbane kvalitetar. Merkevara må appellere til vår felles draum om det gode liv. Service og vertskapsrolla skal prioriterast i alle kvalitetsstandardar.